◆秦来来
今年是农历马年，马路浪、短信里，带“马”字个吉利闲话到处都是。啥个一马当先、快马加鞭、马不停蹄、跃马扬鞭……听也听勿过来。
不过对上了年纪个老朋友来讲，我倒想起一首老老歌，当年解放军总政歌舞团有名个歌唱家马玉涛，唱过一首《马儿啊，你慢些走》。但我今朝劝老年人“慢一眼”，跟这首歌个歌词一点也勿搭界。
我个意思蛮简单：现在年纪大了，碰到啥事情，脑子多转一转，手脚动作一定要慢一眼。
平常吃茶辰光慢一眼，当心勿要呛着；吃饭辰光慢一眼，当心噎牢；走路辰光慢一眼，小心自家掼跤；跑到超市买物事，手机付钞票也要慢一眼。勿要明明只买五十块个东西，手快一划变成五百块，回头还要被自家老太婆埋怨：搿个死老头子，做事体一点脑筋也勿动！
出门离家更加要慢一眼，多检查一遍，屋里向煤气、电灯、自来水，统统要看看有勿有关好。
尤其要当心陌生电话。人家骗侬讲，老伴垃马路浪掼倒了，或是老先生突然生急病送医院抢救，再勿然讲自家儿子闯祸事、被警察捉进去了……碰到搿种事体，千万要沉住气慢一眼，好好想一想，勿要被骗子花言巧语骗走袋袋里个养老钞票。
