文并图/沈一珠
春天里个第一股南风来了，脚跟脚嗰，各式各样带仔春天气息个蔬菜也会蜂拥而来：竹笋、芦笋、蚕豆、枸杞藤、香椿头……
今朝想吃个是油菜花。铺天盖地个油菜花是春天里让人向往个风景，而将开未开个油菜花，就是春天里饭台子上个一道风景线了。搿歇辰光个油菜花顶顶水嫩，口感柔软，花蕾香味斜气足，但也会有一点点苦；等到花蕾绽开小黄花，乃末更加苦，味道也就打折头了。
其实春天辰光新鲜萌动个交关蔬菜侪有点苦，据说，迭个苦涩味道可以让鸟虫敬而远之。只勿过，迭种苦，虫怕，人也勿欢喜，搿么，就用做法搭仔调料解一解，做一份油醋汁油菜花。
搿搭讲个油菜花，其实就是菜苋顶顶头含花蕾个部分，用手拿花蕾扚断备用，顶好覅用刀，据说油菜花跟金属碰着会有涩味。茎、叶子也分别扚下来备用。
扚好个油菜花先摆清水里浸10分钟，一是用水养一养，可以让有点掼头搭脑个油菜花提提精神，二也是可以浸脱点涩味道。新鲜未老个油菜花，用开水焯15秒就好，拎出来沥干，趁热直接浇上油醋汁腌渍就好吃了。油菜花顶好是趁热吃，假使想做成冷菜，沥干后撒点盐，可以勿让菜个颜色恹脱——此地讲个“恹脱”，是指颜色灰蒙蒙，勿新鲜了——然后再放调味料腌渍。
至于剩下来个茎和叶子就用油炒一炒好了，用不着事先焯熟，开油镬，先放茎，再摆叶子，一道翻炒，油会勒菜表面形成一层保护膜，炒出来个菜勿会老苦，颜色也好看；除脱摆盐，上海人还欢喜摆点糖，去去苦味；现在菜嫩个辰光，炒出水分就可以盛出来吃了。再过段辰光，菜老一点了，水分也少了，就加点水盖镬盖，焖几分钟就好。
